Puntland: Go'aanadii guddiga shilin Soomaaliga oo la aqbalay
-
WARIYAHA GAROWE GAROWE ONLINE
- Posted On 18-01-2021, 01:47PM
GAROWE, Puntland – Dowladda Puntland ayaa war-saxaafadeed ay soo saartey Isniinta maanta ah waxay shaaca ka dhigtay in ay aqbashay go’aanadii kasoo baxay Guddiga xalinta tabashadda iyo diidmada shilin Soomaaliya.
"Sidoo kale, waxaa la farayaa hay’addaha ay quseyso in ay fuliyaan go’aanadda guddigu soo saarey isla markaana guddiga loo xil saarey dabagalka sidii loo dhaqan-gelin lahaa," ayaa lagu yiri qoraalka.
Dhanka kale, war-saxaafadeed kasoo baxay guddiga ayaa lagu fahfaahiyey kulan ay maanta ku yeesheen magaaladda Garowe.
"Waxaa maanta oo Isniin ah, bishuna tahay 18/01/2021 kulmey Guddiga Xalinta Dhibaatadda Suuqa Lacagaha ee Puntland. Guddiga ayaa waxay guddo galeen qaabkii loo fulin lahaa go'aamaddii ay soo saareen," ayaa lagu yiri.
Qoraalka ayaa la raaciyey: "Waxaa maantaba shaqo bilaabey Bankiga Dowladda iyo Wasaaradda Maaliyadda Puntland".
"Madaxweynaha Dowladda Puntland ayaa waxa uu soo dhoweeyey go'aanka Guddiga, wuxuuna amrey in hay'adaha ay quseyso, ay fuliyaan go'aamadda kasoo baxay Guddiga. Madaxweyne Dowladda Puntland wuxuu Guddiga u sii xilsaarey xaqiijinta fulinta go'aamadda," ayaa lagu soo xiray.
Guddiga ayaa todobaadkii hore waxay soo jeediyeen go’aano ay kamid yihiin; in ganacsatada iyo dowladda iska kaashadaan socod-siinta shilin Soomaaliya iyo in xayiraada laga qaadey lacagaha la isugu diro telefoonada.
GAROWE ONLINE
