Puntland oo been abuur ku tilmaantay war kasoo yeeray Somaliland
-
WARIYAHA GAROWE GAROWE ONLINE
- Posted On 02-12-2019, 02:36PM
GAROWE, Puntland – Dawladda Puntland ayaa waxay war aan sal iyo raad lahayn ku tilmaantay sheegasho ka timid wasiirka warfaafinta Somaliland.
Saraakiisha Maamulka Hargeysa ayaa Axadii magaaladda Taleex kusoo bandhigay askar ay ku sheegeen in ay kaga soo biireen dhanka Puntland.
Wasiirka Warfaafinta Puntland, ayaa warkaas ku qeexay mid been abuur ah oo aan waxba ka jirin.
Ciidamada lasoo bandhigay ayaa tiradoodu lagu sheegay wadar ahaan 150 askari.
Cali Axmed Sabarey, wasiirka warfaafinta Puntland, ayaa yiri "waxay ahaayeen maleeyshiyaad ay dareeska ciidanka u soo geliyeen".
"Iyagaaba ku jira qalalaaso siyaasadeed maxay ciidamo kala wareegaan Puntland," ayuu hadalkiisa ku daray wasiirka oo warfidiyeenka la hadlay.
Puntland iyo Somaliland ayaa waxaa ka dhaxeysa colaad taariikhi ah oo ku aadan gacan ku haynta gobolada Sool, Sanaag iyo Ceyn.
Labadda maamul oo xifaaltankooda tobanaan sano marayo ayaa waxaa goboladaas u kala jooga maamulo ugu kala magacaaban.
Shaacinta Somaliland ayaa timid markii aagaas uu tegay Wasiirka Beeraha, Saleebaan Koore, oo aad ugu dhow Muuse Biixi Cabdi.
Biixi ayaa wajahaya madax xanuun ku aadan doorashooyinka baarlamanka iyo dowladaha hoose, iyadoo khilaaf uu ka taagan yahay muddo kordhinta baarlamaanka iyo Guurtida, taasoo beesha caalamku diidey.
Xisbiyadda mucaaradka ayaa ku goodiyey in ay taageereyaashooda ugu baaqayaan joojinta canshuurta hadaan la qaban doorashada.
GAROWE ONLINE
