Puntland oo digniin culus hawada u marisay wariyeyaasha

GAROWE, Puntland - Dowladda Puntland oo cod dheer digniin ugu dirtay wariyeyaasha "caadeystay faafinta wararka been abuurka ah" ayaa carabka ku adkeysay in ay ku muteysan karaan "ciqaab adag".

Cawil Sheekh Xaamud, wasiirka cadaaladda iyo dastuurka Puntland oo shir jaraa'id ku qabtey caasimada Garowe, ayaa xusay in maamulka uusan marnaba ogolaan doonin "in sumcadiisa la dilo".

Xilli uu hoosta ka xariiqay in Puntland aysan "waxyeelayn karin" warar lagu faafiyo baraha bulshadda, haddana wuxuu xusay in ay meel adag iska taageyso la tacaalida falalka noocaas ah.

Wariyeyaal uusan carabaabin oo uu tibaaxay in ay "ku mashquulaan" faafinta wararka liddiga ku ah Puntland ayuu ku tartarsiiyey in xooga ay saaraan "horumarinta nafsadooda".

"Dadka noocaas ahi waa in ay ogaadaan Puntland in ay tahay sidda buur aysan dabeyluhu gilgili karin. Waa in ay ogaadaan Puntland in aysan aqbaleyn in sumcadeeda la dilo," ayuu ku daray.

Isagoo aan cid gaar ah magacaabin, wasiirka oo ku nuux-nuux-saday "in aysan jirin dunida meel laga ogol yahay Fake News" ayaa daaha ka rogay in saxafiyiintaas qaarkood ay ku shaqeeyaan dano siyaasadeed.

Maamulka muddo xileedkiisa dastuuriga ah uu dhamaadey ee Farmaajo ayaa lagu eedeeyay in uu malaayiin doolar-ka Mareykanka ku bixiyo sidii uu xasilooni daro ka abuuro maamulada aragti ahaan diidan.

GAROWE ONLINE