Madaxweynaha Puntland oo Xukuumadiisa horgeeyay Baarlamanka

GAROWE, Puntland  - Xukuumadda cusub ee Puntland ayaa la horgeeyay maanta Gollaha Wakiilada, si loo ansixiyo kadib markii todobaadkii tagey lagu dhaariyay xarunta Madaxtooyadda Garowe.

Kahor inta aanan codka kalsoonida loo qaadin, Madaxwayne Deni ayaa ka horjeediyo mudanayaasha Barnaamijkiisa Siyaasadeed iyo Qorshaha ay xukuumadiisa cusub fulineyso.

Intaasi kadib, Wasiirada ayaa is-baray Xildhibaanada, iyagoo soo bandhigaya taariikhdooda iyo khibrada aqooneed oo ay leeyihiin, taasi oo ay ugu adeegayaan shacabka.

Gollaha xukuumada cusub ee DPL oo ka kooban 48 ayey u badan tahay in la meel-mariyo, maadaama ay haystaan inta badan kalsoonida Xildhibaanada, kuwaasoo Madaxwaynaha doortay 8-da bishii hore.

10-ka bishaan Febraayo ayay ahayd markii la magacaabay Gollaha Wasiirada cusub, kuwaasi oo tirro ahaan ka yar xukuumadii Cabdiwali Gaas oo ku haray wareegii 1aad ee coddeyntii u dambeysay.

Shacabka reer Puntland ee ku nool daafaha caalamka ayaa soo dhaweeyay wasiirada cusub, iyaga oo ku tartarsiiyay in ay dar-dargeliyaan dadaalada dimoqraadiyeenta maamulkaan 20-sano jirka ah.

GAROWE ONLINE