Wasiirka warfaafinta Puntland oo warbixin laga dhageystay

GAROWE, Puntland -  Guddiga Arrimaha Bulshada iyo Dhaqanka Golaha Wakiillada DPL ayaa kormeer shaqo ku tagay Wasaaradda Warfaafinta, Isgaarsiinta,  Dalxiiska, Hiddaha iyo Dhaqanka DPL, halkaas oo ay warbixin kaga dhageysteen Wasiirka & Agaasimaha Guud ee Wasaaradda.

Wasiirka Wasaaradda Warfaafinta, Isgaarsiinta,  Dalxiiska, Hiddaha iyo Dhaqanka DPL Mudane, Cabdullahi Cali Xirsi ( Timacadde) oo ay wehliyaan Wasiir kuxigeenka Wasaaradda Mudane, Cabdisalaan Xaaji Siciid Faarax iyo Agaasimaha Guud Wasaaradda Eng. Maxamed Ciise ayaa ka warbixiyey shaqooyinka Wasaaradda, qorshayaasha degsan, waxyaabaha u qaab-soomay iyo weliba caqabadaha jira, isaga oo sidoo kalena, su'aalo laga weydiiyay arrimaha ay ka hadleen Wasiirka, Wasiir ku xigeenka & Agaasimaha Guud ee Wasaaradda isla markaana ay Guddigu u hawlgalidoonaan sidii wax looga qaban lahaa caqabadaha ka jira Wasaaradda ayna doorkooda ka qaadanayaan.

Dhanka kalena, Guddiga ayaa kormeeray dhammaan waaxyaha  kala duwan ee Wasaaradda si ay u ogaadaan guud ahaan shaqooyinka ay dalka iyo dadka Puntland u hayaan.

Kormeerka Guddiga ayaa qeyb ka ah shaqooyinka Guddiyada Golaha Wakiillada DPL ee la socoshada Hay'adaha fulinta dalka.

GAROWE ONLINE