Ciidamada Dowladda oo ku dhaw inay si buuxda u xoreeyaan gobolka Mudug

Gaalkacyo, Soomaaliya - Ciidamada Xoogga Dalka ayaa howlgallo ka wada deegaanada ay wali uga harsan yihiin kooxaha Xaqjirka ah Gobolka Mudug, iyadoo ay dowladda Federaalka dhawaan shaacisay in tiro horjoogayaal ah oo ka tirsanaa kooxda AS lagu dilay gobolka, qaar kalana ay isa soo dhiibeen.

Howlgallada ayaa inta badan kusoo arooray howdka deegaanka Shabeelow oo ka mid ah deegaanada fara ku tiriska ah ee ku yaala gobolka Mudug kuwaas oo ila haatan uga jira gacanta ‘AS’, waxaana laga gaaray guulo waaweyn sida ay shaacisay warbaahinta dowladda.

Ciidamada Dowladda oo deegaanka ku qaaday weerar dhowr jiho ah ayaa jab xoogan gaarsiiyay xubnaha ka tirsan ‘AS’ ee ku sugnaa aagaas, iyaga oo garab ka helaya ciidamada deegaanka ee loo yaqaan “Macawisley”.

Dadaalkan lagu doonayo in lagu soo afjaro ‘AS’ ay hormuudka u yihiin ciidamada Xooga Dalka ayaa la filaya hadii uu guuleysto in gobolka Mudug uu noqdo gobolka 1-aad ee si buuxda looga xoreeyo ‘AS’ tan iyo markii oo iclaamiyey Madaxweyne Xasan Sheekh Maxmuud dagaalka ka dhan ah Kooxdan.

GAROWE ONLNE