Dowladda Federaalka oo ku baaqday in la caawiyo dadka ay fatahaaduhu saameeyeen

BAYDHABO, Soomaaliya - Ra’iisul Wasaare ku xigeenka Xukuumadda Federaalka Soomaaliya, Saalax Axmed Jaamac, ayaa maanta gaaray magaalada Baydhabo, si uu ugu kuurgalo xaaladda dadka ay saameeyeen fatahaadaha ka dhashay roobabkii dayrta.

Kormeerka wasiir ku-xigeenka ayaa waxaa ku wehelinayey mas’uuliyiin ka tirsan Hay’adda Maaraeynta Masiibooyinka Qaranka, xubno ka socday hay’adaha samofalka iyo saaxiibada caalamiga ah.

Intii uu ku guda jiray Booqashada ayaa waxaa uu kormeeray xeryaha qaxootiga, dadka ay saameeyeen fatahaadaha, iyo barakacayaasha, isagoo sidoo kale kulamo la qaatay maamulka Koonfur Galbeed.

Ra’iisul Wasaare ku xigeenka ayaa sidoo kale ku booriyay madaxweynaha Koonfur-galbeed, Cabdicasiis Xasan Laftagareen iyo hay’adaha ka shaqeeya arrimaha gargaarka inay mideeyaan dhammaan dadaallada socda ee lagu samata bixinayo dadka ay fatahaaduhu saameeyeen.

Sidoo kale waxa uu ugu baaqay bulshada Soomaaliyeed ee ku dhaqan dalka dibadiisa gaar ahaan ganacsatada in ay soo farageliyaan sidii loo caawin lahaa dadka ay roobabku saameeyeen.

GAROWE ONLINE