Dowladda Soomaaliya oo deeq lacageed ka heshay Shiinaha
-
GAROWE ONLINE XAFIISKA MUQDISHO
- Posted On 22-11-2023, 11:31AM
MUQDISHO, Soomaaliya - Gudoomiyaha Hay'ada Maaraynta Musiibooyinka qaranka Maxamuud Macalin Cabdulle ayaa maanta kala wareegay Safaaradda Shiinaha ee Soomaaliya Deeq-lacageed oo gaaraysa Boqol soddon iyo sagaal kun, saddex boqol toban iyo siddeed, afartan iyo shan Sent ($139.318.45).
Deeqda ayaa sida la sheegay loogu talagalay howlaha samafalka fatahaadaha waxaana guddoomiyaha hay’adda SoDMA ku wareejiyay Safiirka Shiinaha u fadhiya Soomaaliya Ambassador, Fei Shengchao.
Guddoomiyaha hay’adda maareynta musiibooyinka Qaranka ayaa sheegay in dowladda Shiinuhu ay tahay dowladdii ugu horreeysay ee xiriir kala soo samaysa arrimaha fatahaadaha, taasina ay ugu mahad celinayaan.
Warbaahinta Dowladda ayaa warisay in Guddoomiyaha iyo Safiirka Shiinaha ay ka wada hadleen sidii daadadka ka dib ay dowladdiisu gacan ugu geysan lahayd dib u dhiska buundooyinkii ku burburay fatahaadaha iyo in xal loo helo dhibaatada ay biyuhu ku hayaan Soomaaliya.
Si kastaba ha ahaatee Soomaaliya ayaa isbuucyadii u danbeeyay waxaa ka da'ay roobab aad u xoogan kuwaas oo saameeyay meelo badan oo ka mid ah Dalka.
GAROWE ONLINE
