Macawiisleyda oo ka baxay furimaha dagaalka Hiiraan, kuna qulqulay Beledweyne

BELEDWEYNE —Macawiisleyda beesha Xawaadle, kuwaas oo ciidamada dowladda Soomaaliya kala dagaallamay Al-Shabaab, ayaa isaga baxay fariisimihii ay kaga sugnaayeen furimaha dagaalka ee gobolka Hiiraan, xilli hoggaamiyeyaasha beesha ay wadaan qorshe ay ku dhisayaan maamul ka madax-bannaan dowladda federaalka.

Maleeshiyaadkan ayaa ka baxay fariisimihii ay ku lahaayeen degmooyinka Matabaan iyo Buulo Burde, iyadoo ay jiraan walaac laga qabo inay sidoo kale ka baxaan aagga degmada Jalalaqsi, sida ay ku warrameen Saraakiisha gobolka.

Tallaabadan ayaa timid kadib markii maleeshiyaadka beesha Xawaadle ay dhammaadkii toddobaadkii tegay la wareegeen xarumo maamul iyo xafiisyo dowladeed oo ku yaalla magaalada Beledweyne, xarunta gobolka Hiiraan.

Wararka ayaa sheegaya in ku dhowaad 2,000 oo dagaalyahan oo hubeysan ay hadda ku sugan yihiin Beledweyne, halkaas oo ay hoggaamiyeyaasha siyaasadeed ee Hawadle doonayaan inay ka dhisaan maamul ka madax-bannaan dowladda federaalka iyo maamulka HirShabeelle.

Cabsi laga qabo in ciidamo kale ay goostaan

Dhaqdhaqaaqa Macawiisleyda ayaa abuuray walaac ku saabsan suurtagalnimada in askarta beesha Xawaadle ee ka tirsan ciidamada dowladda federaalka ee gobolka Hiiraan ay iyaguna ka goostaan ciidanka.

Haddii ay taasi dhacdo, waxaa sii wiiqmi kara difaaca deegaannada ay dowladda weli gacanta ku hayso, taas oo fursad siin karta Al-Shabaab inay ballaariso weerarradeeda.

Al-Shabaab ayaa dib ula wareegtay dhul badan oo ciidamada dowladda iyo Macawiisleydu ka qabsadeen sannadihii 2022 iyo 2023, kadib guluf militari oo xooggan oo dhacay 2025.

Macawiisleyda ayaa la abaabulay sannadkii 2022, si ay uga hortagaan Al-Shabaab, waxaana dagaalkaas taageero ka siiyey dowladda federaalka Soomaaliya, Itoobiya iyo Mareykanka.

Khilaafka hoggaanka HirShabeelle

Xiisadda hadda taagan ayaa salka ku haysa khilaaf siyaasadeed oo u dhexeeya siyaasiyiinta Xawaadle iyo dowladda federaalka, gaar ahaan loollanka hoggaanka maamulka HirShabeelle.

Siyaasiyiinta Xawaadle ayaa Xasan Sheekh ku eedeeyay inuu ka baxay ballanqaad uu hore ugu sameeyay beesha, kaas oo ahaa in loo oggolaanayo xilka madaxweynaha HirShabelle, balse markii dambe uu dhinac maray.

Waxay sidoo kale dowladda federaalka ku eedeeyeen inay taageertay madaxweynaha hadda talada haya ee HirShabeelle, Cali Cabdullaahi Xuseen (Cali Guudlaawe), doorashadii dib loogu doortay oo ay sheegeen in Muqdisho soo qabanqaabisay, natiijadeedana ay saameyn ku lahayd.

Cabdullaahi Maxamed Cali Sanbaloolshe, oo hore u soo noqday agaasimaha Hay'adda Nabad Sugidda iyo Sirdoonka Qaranka (NISA), ayaa dhowaan sheegay in kooxdiisu qorsheyneyso inay Hiiraan ka dhisto maamul ka hor yimaada dowladda federaalka.

Sanbaloolshe ayaa sidoo kale sheegay inay la safan karaan cid kasta, oo ay ku jirto Al-Shabaab, si ay xilka uga tuuraan Xasan Sheekh Maxamuud.

Weli ma cadda sida uu ku dhammaan doono khilaafkan siyaasadeed iyo in dowladda federaalku ciidamo dheeraad ah u diri doonto gobolka Hiiraan, xilli isbeddelka ku yimid fariisimaha Macawiisleyda uu walaac ka abuurayo xaaladda amni ee gobolka.

GAROWE ONLINE