Mucaaradka Soomaaliya oo oggolaaday wada-hadal cusub oo ay la yeeshaan Xasan Sheekh

MUQDISHO — Madasha Samatabixinta Qaranka ayaa oggolaatay in Madaxweyne Xasan Sheekh Maxamuud la siiyo fursad kale oo uu khilaafka siyaasadeed ee dalka ku xalliyo wada-hadal, taas oo suuragal ka dhigaysa in dib loo bilaabo wada-xaajoodkii dowladda Federaalka iyo mucaaradka.

Go’aankan ayaa yimid kaddib kulammo isdaba joog ah oo ay magaalada Muqdisho ku yeesheen siyaasiyiinta mucaaradka, kuwaas oo muddooyinkii u dambeeyay isku khilaafsanaa dowladda Federaalka arrimaha wax-ka-beddelka dastuurka, nidaamka doorashooyinka iyo awood-qaybsiga siyaasadeed.

Mucaaradka ayaa horey uga horyimid qorshaha dowladda ee wax-ka-beddelka dastuurka iyo hirgelinta nidaam doorasho oo cusub, iyagoo ku dooday in tallaabooyinkaasi yihiin kuwo aan heshiis siyaasadeed oo loo dhan yahay lagu gaarin, isla markaana ay saameyn karaan tartanka doorashada iyo nidaamka federaalka.

Sida Warsidaa Garowe Online ogaadey, mucaaradku waxay sheegeen in wada-hadal toos ah oo dhex mara dhinacyada Soomaalida uu ka wanaagsan yahay heshiis ay soo dhexdhexaadiyaan dowlado shisheeye ama hay'ado caalami ah. Waxay ku doodeen in xal gudaha laga gaaro uu sare u qaadayo lahaanshaha Soomaalida iyo kalsoonida lagu qabo heshiis kasta oo la gaaro.

Tallaabada ugu horreysa ee qorshahan ayaa ah in mucaaradku ay magacaabeen wafdi ka kooban saddex xubnood oo 14-ka bishan la kulmi doona guddiga farsamada ee dowladda. Labada dhinac ayaa la filayaa inay ka wada xaajoodaan ajandaha iyo qodobada lagu saleynayo kulamada siyaasadeed ee xiga.

Wafdiga mucaaradka waxaa ka mid ah madaxweynihii hore ee Galmudug, Cabdiraxmaan Sheekh Xasan Guuleed, iyo xildhibaannada Cabdiraxmaan Cabdishakuur Warsame iyo Cabdullaahi Carab.

Go’aanka mucaaradka ayaa sidoo kale yimid kaddib kulammo ay wakiilladoodu la yeesheen agaasimaha Hay’adda Nabad-sugidda iyo Sirdoonka Qaranka (NISA), Mahad Maxamed Salaad, kaas oo la sheegay inuu ku boorriyay inay aqbalaan casuumaadda madaxweynaha, isla markaana fursad kale siiyaan dadaallada wada-hadalka.

Si kastaba, heshiiska dib loogu bilaabayo wada-hadallada macnaheedu ma aha in dhinacyadu isku afgarteen khilaafaadka taagan ama in mucaaradku taageereen qorshaha doorasho ee dowladda.

Waxaa sidoo kale weli aan caddayn in Puntland iyo Jubaland ay ka qeyb geli doonaan wada-hadallada. Labada maamul iyo siyaasiyiin mucaarad ah ayaa qeyb ka ah Golaha Mustaqbalka Soomaaliyeed, oo si weyn uga soo horjeeda habka ay dowladda Federaalka u maareyneyso wax-ka-beddelka dastuurka iyo arrimaha doorashooyinka.

Qodobada ugu waaweyn ee weli la isku hayo waxaa ka mid ah wax-ka-beddelka dastuurka, qaabka doorashada, awoodaha dowladda Federaalka iyo dowlad-goboleedyada, iyo dammaanad qaadka in doorashada soo socota ay noqoto mid loo dhan yahay oo tartan dhab ah leh.

Wada-hadalladan ayaa imanaya xilli Soomaaliya ay isku diyaarineyso doorashooyinka 2027, iyadoo khilaafka siyaasadeed uu sii adkeeyay dadaallada lagu gaarayo heshiis ku saabsan nidaamka doorashada iyo jadwalka doorashooyinka.

GAROWE ONLINE