Madaxweynaha oo Dhuusamareeb kula kulmay saraakiisha Ciidanka

DHUUSAMAREEB, Soomaaliya - Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kulan ka dhacay Xarunta Ciidanka Xoogga Dalka Soomaaliyeed ee Dhuusamareeb, kala hadlay Saraakiisha Guutada Gorgorka dagaalka ay kula jiraan ‘AS’.

Waxa uu ku nuux-nuux saday muhiimadda uu leedahay dagaalkan, isaga oo la barbar dhigay halgankii taariikhiga ahaa ee loo soo maray xornimada Soomaaliyeed ee lagula dagaalamayey gumeystaha shisheeye.

Madaxweyne Xasan Sheekh ayaa u sheegay ciidamdaan in ay xaqa u dirirayaan,, oo ay dagaalkan u qaadeen mabaadii’da Islaamka, isaga oo saraakiisha ugu duceeyo inuu ilaahay ka aqbalo.

Wuxuu ku ammaanay saraakiisha sida ay ugu heelan yihiin in ay sharaf iyo karaamo u helaan qarankooda, iyadoo dowladda iyo shacabka Soomaaliyeed ay si adag u garab taagan yihiin qadiyaddooda.

Madaxweynaha ayaa muujiyay sida uu ula dhacsan yahay waddaniyadda, cududooda, iyo geesinimada saraakiisha ay ka muujiyeen dagaallada socda.

Waxa uu ku booriyay in ay laba jibaaraan dadaalkooda iyo in ay si dhow ula shaqeeyaan shacabka Soomaaliyeed si ay si hufan ula dagaalamaan khatarta ‘AS’.

GAROWE ONLINE