Madaxweynaha oo Saraakiisha Ciidanka kala shiray dagaalka ‘AS’

MUQDISHO, Soomaaliya - Madaxweynaha Jamhuuriyadda Federaalka Soomaaliya, ahna Taliyaha Guud ee Ciidammada Qalabka Sida, Xasan Sheekh Maxamuud, ayaa kulan la qaatay Saraakiisha iyo Taliyeyaasha Ciidammada Qaranka, isagoo kala hadlay xaaladda amni ee dalka.

Kulanka ayaa waxaa goob joog ka ahaa Wasiirka Gaashaandhigga Xukuumadda Federaalka Soomaaliya Cabdullaahi Maxamed Nuur, Taliyaha Ciidanka Xoogga Dalka Sarreeye Guuto Ibraahim Sheekh Muxuyadiin iyo Taliyaha Ciidanka Booliska Soomaaliyeed Sarreeye Guuto Sulub Axmed Firin.

Madaxweynaha ayaa tilmaamay in hirgalinta qorshaha mudada dhow ay horseedayso guulaha ay sugayaan shacabka Soomaaliyeed ee ku aadan ciribtirka ‘AS’.

“Waxaan bogaadinaynaa naf-hurnimada Ciidanka Soomaaliyeed ee u istaagay xoraynta deegaannadii ay ku sugnaayeen argagixisada, waxaana la filayaa in ciidamada deegaanku ay kaalin mug leh ka qaataan halgankan.” ayuu yiri.

Ciidamada dowladda ayaa la filayaa in ay billaabaan wajiga labaad ee howlgalka ka dhanka ah ‘AS’, kadib markii ay kala wareegaan magaalooyinka ay kaga harsan yihiin Dowlad-Goboleedyada Hirshabeelle iyo Galmudug.

GAROWE ONLINE