Madaxweyne Xasan sheekh oo ka hadlay Hiigsiga Soomaaliya ee 2060

MUQDISHO, Soomaaliya - Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ka hadlay diyaarinta hiigsiga fog ee horumarinta Soomaaliya oo uu ugu magac daray Hiigsiga 2060-ka, xilli uu ka qeyb galayay dood cilmiyeed cinwaankeedu ahaa “Hannaanka Jiheynta Dowladnimada Casriga ah ee Soomaaliya”.

Madaxweynaha ayaa si qoto dheer uga hadlay muhiimadda ay leedahay aragtidan, taasoo saldhig u ah abuurista qorshe oo dammaanad qaadaysa xasiloonida geeddi-socodka horumarineed ee Soomaaliya.

Waxa uu sidoo kale xusay in Hiigsiga 2060-ka ee Soomaaliya uu ka tarjumayo boqol-guuradii ka soo wareegatay Xornimada Qaranka Soomaaliya. Isaga oo ku nuux-nuuxsaday in hadafkiisu uu yahay in sanadka 2060-ka uu Soomaaliya noqoto dal horumarsan.

Madaxweynuhu wuxuu faray dhammaan wasaaradaha in ay ka qaybqaataan qorshahan, isaga ooo sheegay in tallaabadan ay muujinaysa sida ay Dowladda Federaalka Soomaaliya uga go’an tahay in ay mudnaan siiso qorsheynta mustaqbalka fog.

GAROWE ONLINE