Mas’uuliin ka tirsan JFS iyo Galmudug oo gaaray magaalada Camaara

CAMAARA, Soomaaliya - Masuuliyiin ka tirsan Jamhuuriyadda Federaalka Soomaaliya iyo Dowlad-Goboleedka Galmudug ayaa maanta gaaray Magaalada Camaara ee gobolka mudug, halkaas oo ay dhawaan dowladda kala Wareegay kooxda ‘AS’.

Masuuliyiinta ayaa waxaa Camaara kusoo dhaweeyay Saraakiisha Ciidamada Xoogga Dalka, Daraawiishta Galmudug, kuwa Deegaanka, iyo qeybo ka mid ah bulshada deegaanka.

Taliye ku xigeenka Ciidanka lugta Cabdulaahi Aden xuseen Ciro ayaa masuuliyiinta uga warbixiyay Guulihii Ciidamada Xoogga Dalka, Daraawiishta Galmudug iyo kuwa Deegaanku kasoo hooyeen dagaalada ay AS kula galeen Bacadweyne, Qeycad iyo Camaara, sida ay sheegtay warbaahinta dowladda.

Ciidamada Soomaaliya ayaa dhawaan xoojiyay howlagalada ay ka fulinayaan Gobolka Mudug, iyaga oo la wareegay deegano hor leh. Dadka ka faalooda arrimaha amniga ayaa aaminsan in wax ka bedelka lagu sameeyay Istraatijiyadda ciidanka uu saameyn ku yeeshay sida uu u socda dagaalka ka dhanka ah ‘AS’.

GAROWE ONLINE