Muqdisho: Faahfaahinta qarax lala eegtay goob ganacsi oo lagu xiray Kaamirooyin CCTV

Illaa iyo hadda ma jiro wax war ah oo ka soo baxay laamaha ammaanka.

MUQDISHO, Soomaaliya - Wararka ka imaanaya magaalada Muqdisho ayaa tibaaxaya in rag ka tirsan kooxda “AS” ay isku dayeen qarxinta goob ganacsi oo ku yaalla Suuqa Bakaaraha oo lagu xiray Kaamirooyin CCTV.

Laamaha amaanka ayaa la warinaya inay ka war heleen ragga maleegay qaraxa oo ka kooban laba qof, iyaga oo dilay mid ka mid ah, halka uu dhaawacmay kan kale.

Waxaa sidoo kale la sheegay in isla goobtay lagu dilay nin shacab, taas oo kor u qaadaysa tirada dadka ku dhinteen qaraxaan oo gaaraya laba qof.

Illaa iyo hadda ma jiro wax war ah oo ka soo baxay laamaha ammaanka iyo kooxda “AS” oo ku saabsan falkan, iyadoo weli ay socdaan baaritaano la xiriira.

Magaalada Muqdisho ayaa waayahan ku soo badanaya qaraxyada ay geysanayaan kooxaha argagaxisada oo ka soo horjeeda in goobaha ganacsi lagu xiro CCTV.

GAROWE ONLINE