Muxuu ka hor jeediyay madaxweynaha ciidamada Soomaaliyeed ee tababarka u jooga Ereteriya?

ASMARA - Madaxweynaha dalka Mudane Xasan Sheekh Maxamuud oo uu wehliyo Madaxweynaha Ereteriya Isaias Afwerki ayaa booqday xero ciidan oo lagu tababaro ciidamada Soomaaliya oo ku taalla caasimadda Asmara.

Ciidamada badda Soomaaliya ayaa halkaasi ku qaadanayey tababar ciidan oo heerkiisu sareeyo, waxaana madaxweynaha uu halkaasi ka jeediyey khudbad dhiirigelin ah.

Sida lagu baahiyey warbaahinta dowladda, Madaxweynaha ayaa bogaadiyay Wadaniyadda, dhabar-adeegga iyo kartida ay muujiyeen Ciidanka Xoogga dalka Soomaaliyeed mudadii ay tababarka ku jireen.

Madaxweynaha ayaa faray in ay u diyaar garoobaan sidii ay uga biiri lahaayeen ciidamada dowladda iyo kuwa deegaanka ee u dagaallamaya in dalka laga xoreeyo ‘AS’.

Kumanaan askari oo Soomaali ah ayaa tababar ciidan ku qaadanaya dalalka Ereteriya, Uganda iyo Masar, si ay u daboolaan bixitaanka ciidamada ATMIS ee la qorsheeyay dhammaadka sanadkan.

GAROWE ONLINE