Ra’iisul Wasaaraha oo daah furay barnaamijka Aqoonsiga Qaran

MUQDISHO, Soomaaliya - Ra’iisul Wasaaraha Xukuumadda Federaalka ah ee Soomaaliya Xamsa Cabdi Barre ayaa daah-furay Munaasabad ku beegan maalinta caalamiga ah ee Aqoonsiga Dadweynaha ee 16-ka Sebtembar.

Intii lagu guda jiray munaasabadda, Ra’iisul Wasaare Xamsa waxa uu ku nuux-nuux saday muhiimadda uu barnaamijkan u leeyahay xal u helida caqabadaha dalka ka jira.

Waxa kale oo uu iftiimiyay dadaallada lagu ilaalinayo macluumaadka muwaadiniinta, isagoo ka shidaal qaadanaya sharciyada Danmark, si loo xaqiijiyo nidaam aqoonsi oo sugan oo habaysan.

“Maanta wixii ka dambeeya muwaadiniintayada waxaa la siin doonaa kaarka aqoonsiga dadweynaha, waana xuquuq dastuuri ah oo u sahlaysa inay helaan xuquuq buuxda” ayuu yiri Ra’iisul Wasaare Xamsa intii ay socotay munaasabadda.

Wuxuu sidoo kale u mahadceliyey Pakistan iyo hay'adaha kale ee taageera sida Bangiga Adduunka iyo UNDP oo gacan ka geystay.

GAROWE ONLINE