Ruushka oo Soomaaliya ka cafiyey lacag dhan $684 Milyan

MOSCOW, Ruushka - Soomaliya iyo Ruushka ayaa magaalada Saint-Petresburg ku kala saxiixdey heshiis muhiim u ah barnaamijka Deyn Cafinta.

Heshiiskan oo Wasiirka Maaliyadda Xukuumadda Federaalka Soomaaliya, Biixi Iimaan Cige la saxiixday Wasiir ku Xigeenka Maaliyadda dalka Ruushka Mudane Timur Igorevich Maksimov ayaa lagu doonayay in Dawladda Soomaaliya laga cafiyo lacag dhan $684 milyan oo Doollar.

Wasiirka Maaliyadda Soomaaliya Biixi Iman Cige oo qoraal kooban ku soo bandhigay bartiisa Facebook ayaa yiri:

"Waxa aan ku faraxsanahay in aan Wasiir ku-xigeenka Maaliyadda dalka Ruushka aan la saxiixday heshiis ay Dowladda Ruushku Soomaaliya uga cafisay lacag $684 Milyan oo Doollar."

Sidoo kale wasiirka ayaa sheegay in is-afgarad laga gaaray lacag gaareysa $7.5 Milyan oo ka mid ahayd deymihii ay Dowladda Ruushka ku laheed Soomaaliya. Tallaabadan ayaa door weyn ka ciyaareysa dhameystirka barnaamijka deyn cafinta dalka.

Heshiiskaan ayaa goobjoog ka ahaa Ra’iisul Wasaare ku xigeenka Xukumadda Federaalka Soomaaliya Salaax Axmed Jaamac iyo masuuliyiin kale oo ka kala socotay dalalka Ruushka iyo Soomaaliya.

GAROWE ONLINE