Shan xaqiiqo oo aad uga baahan tahay duufaanta kusoo fool leh Soomaaliya

GAROWE, Puntland – Hay'addo caalami ah iyo dowladdo waaweyn ayaa ka digaya duufaan kusoo fool leh xeebaha Soomaaliya xili dalka ka daalaadhacayo fatahaadyo.

Khuburadda ayaa waxay rumeysan yihiin in roobabka dabaylaha wata ay si gaar ah ugu kusii jeedaan xeebaha maamulada deriska ah ee Puntland iyo Somaliland.

Roobabka ayaa markii hore ku wajahnaa xeebaha Carabta gaar ahaan waddanka Yemen, balse sidda ay sheegeen xeeldheereyaasha, waxay u soo wareegatay Bariga Afrika.

Mas'uuliyiinta ayaa shacabka gaar ahaan reer miyiga xeebaha degan ku booriyey feejinaan dheeraad ah iyo in ay isaga baxaan guud ahaan dhulka ku teedsan maanyadda.

Dowladda Puntland oo digniinta gaarsiisay shacabkeeda ayaa ka dhawaajisay in ay ka fekereyso joojinta safarka badda si loo yareeyo waxyeelada ka dhalan karta.

Urur goboleedka IGAD oo bayaan digniin ah soo saarey ayaa soo bandhigay shan xaqiiqo oo aad u baahan tahay in aad ka ogaato duufaankan khatarta badan.

War-saxaafadeedkan ururkan kasoo baxay ayaa lagu tartarsiiyay daneeyayaasha in ay kaalin muuqata ka qaataan la tacaalida mushkiladaha ka dhalan kara musiibadan.

Shanta xaqiiqo

Duufaanka oo lagu magacaabo KYARR ayaa la rajeynayaa in uu roobab dabalyo xoogan wata iyo biriqyo ka geysan doono xeebaha Puntland iyo Somaliland.

Duufaankan waa mid si qalafsan wax u burburiya. Kalluumeysata iyo dadka ka howlgala badaha waxaa lagula talinayaa in ay taxadar muujiyaan.

Tan iyo sanadkii 2006-dii, duufaankaan ayaa aad ugu xooganaa Bariga qaaradda Afrika, waxayna timaadaa xili roobaadyadda Deyrta.

Baqdinta laga qabo in roobabka dabaylaha wata ay sababaan daadadka waaweyn oo waxyeelo daran sababa ayaa ka jirta guud ahaan gobolka Geeska Afrika.

Roobabka waaweyn ayaa la saaraadinayaa in ay si caadi ah u socon doonaa inta u dhaxeysa bilaha November illaa iyo December ee dabayaaqadda sanadkan 2019.

GAROWE ONLNE