Soomaaliya: SSC-Khaatumo oo maxaabiis dhaawac ah usii deysay Somaliland

LAASCAANOOD, Soomaaliya - Hay’adda Laanqayrta Cas ee Caalamiga ah ee ICRC ayaa fududaysay sii deynta laba maxbuus oo lagu hayay magaaladda Laascaanood kuwaasoo ay u qaaday Hargeysa, tallaabo loo sameeyey arrimo bani’aadanimo.

Labada maxbuus ayaa kamid ah askartii Somaliland bishii hore looga qabtay dagaalkii Goojacadde.

Hay’adda Bisha Cas oo kaashanaysa Hay’adda Bisha Cas ee Soomaaliyeed (SRCS), waxay ICRC u abaabushay in maxaabiista la sii daayo loo qaado Garoowe, ka dibna waxaa Hargeysa lagu keenay diyaarad ay leedahay Laanqeyrta Cas. Hawlgalka maanta ayaa la macno ah in labada qof ee dhaawaca ah ay hadda heli doonaan daaweyn caafimaad oo ku filan.

"Waan ku faraxsanahay inaan awoodnay inaan fududeyno sii deynta dhexdhexaadiye dhexdhexaad ah," ayuu yiri Samer Jarjouhi, oo kormeera barnaamijyada ICRC-da ee Soomaaliya oo la socday diyaaradda.

“Dadka dhaawaca ah waxay heli doonaan daaweyn gaar ah oo ay la joogaan eheladooda. Waxa aanu rajaynaynaa in hawlgalkani uu sii ahaado mid kalsooni ka dhex abuurta Laanqayrta Cas iyo Somaliland iyo SSC Khaatumo.

Siideyntan ayaa kusoo aadeysa xili ICRC ay booqaneyso maxaabiista labada dhinac ee dirirtu u dhaxeyso. 31kii Agoosto, kooxda ICRC waxay booqdeen maxaabiista Laascaanood, halka Sebtembar 4, koox kale booqatay xabsiga dhexe ee Hargeysa.

Isla markiiba ka dib markii uu dagaalku ka qarxay gobolka Sool bishii Febraayo, ICRC waxay sahay qalliin ah siisay lix isbitaal oo ku yaal aagga iyo xirmooyinka labiska kooxda ambalaasta ee SRCS ee magaalada Laascaanood. ICRCdu waxay kaloo qoysaska barakacayaasha ah ku taageertay lacag caddaan ah waxayna si firfircoon uga shaqaynaysaa sidii ay isugu xidhi lahayd qoysaska ka soocay kuwa ay jecel yihiin.

GAROWE ONLINE