Wariye ku Geeriyooday Qarax Muqdisho ka dhacay.

MUQDISHO, Soomaaliya - Qaraxa fiidnimadii xalay ka dhacay makhaayad ku taala agagaarka xarunta Hay'dda Nabad Sugida iyo sirdoonka Soomaaliya ayaa waxaa ku geeriyooday dhawr qof oo uu kamid yahay, weriye Cabdifataax Macalin Nuur"Qeys".

Marxuum Qeys ayaa ugu geeriyooday isbitaalka Dhaawicii Qaraxa.

Wariyahaan ayaa muddo dhawr iyo toban sano ah kasoo shaqeeyay warbaahinta magaalada Muqdisho isaga oo haatan ahaa Agaasimaha telefishinka Somalicable.

Jaamacadda Muqdisho ayuu ka qaatay shahaadada heerka koowaad iyo Saxaafadda iyo Siyaasadda isaga oo xubin ka ahaa naadiga/Ururka Qalinjabiyayaasha jaamacadda.

Dadka yaqaanay waxay ku tilmaameen weriye toosan oo ka dhawrsanaa dabeecado inta badan gaabis ka dhigay dadaalka wariyayaasha isaga oo lahaa hiigsi horumarineed.

Geerida Qeys ayaa qeyb ka noqonaysa xanuunka joogtada ah ee ay la kulmaan bahda warbaahinta ee gudaha Soomaaliya iyada oo sanad kasta tiro badan lagu dilo gudaha dalka halka tiro intaas ka badan ay dalka isaga cararaan iyaga oo raadinaya meel ay ku nabad galaan.

GAROWE ONLINE