Ilhaan Cumar oo su'aallo ka keentay duqeyntii Mudug

Ilhaan Cumar ayaa warqad u dirtey madaxwayne Joe Biden. [Photo: Los Angeles Times]

MUQDISHO, Soomaaliya – Xildhibaanad Ilhaan Cumar oo warqad u qortey madaxweynaha Mareykanka, Joe Biden, ayaa ka dalbatay in uu sharaxaad ka bixiyo sharciyadda iyo ujeedada ka dambeysay weerarkii dhanka cirka ee ciidanka Ameerikaanka Talaadadii asbuucaan ka fuliyeen Soomaaliya.

Ilhaan oo asal ahaan kasoo jeeda Soomaaliya lagana soo doortey Minnesota kana mid ah xisbiga talada haya ee dimuqraadiga ayaa warqaddan ka kooban laba bog ku sheegtay in Aqalka Sare uu ku fashilmay balanqaadida iyo bixinta magdhow qoysaska dadkooda horey ugu waayey duqeymaha.

Sida laga soo xigtay warqaddan uu nuqul kamid ah arkay warsidaha Garowe Online, qiilka waaxda gaashaandhiga Mareykanka u sameysay duqeyntan oo ah "in ay ahayd ah mid lagu difaacayey ciidamadda Danab waa mid aan loo meel-dayi karin si loogu xadgudbo shuruucda naf rayidna loo gooyo".

"Waa muhiim in aan ogaanno in si dhib yar aan geeri ugu horseedno dhibaatada Al-Shabaab darteed," ayay Ilhaan Cumar qortey. "Sidoo kale, waa muhiim in talaabo kasta oo istiraatiijiyad ballaaran ay tahay mid ugu horeyn diiradda lagu saarayo amniga dadka Soomaaliyeed iyo xasilloonida qaranimada Soomaaliya".

Hadalka Ilhaan ayaa si gaar ah wuxuu u durayaa in duqeyntaas la fuliyey iyaddoo aan laga soo fasaxin Washington. Maamulka Biden wuxuu bedelay siyaasadii duqeymaha Afrika gaar ahaan Soomaaliya oo kalkii hore go’aan ka gaari jireen taliyeyaasha aagaga iyo taliska guud ee qaaradda ee Afrika.

Si loo yareeyo khasaaraha shacabka, maamulka Biden wuxuu dib-u-soo-celiyey siyaasadii ahayd in amarka duqeynta laga bixiyo Washington taasoo duqeynti Talaadadii oo ahayd tii ugu horeysay markii uu xafiiska uu yimid la baalmaray, waana sababta keentay in Ilhaan Cumar ay ka qaylo-dhaamiso.

Howlgalkii dhacay Talaadadii oo uu ka dambeeyay weerar kale oo Khamiistii shalay ay diyaaradaha ka fuliyeen isla gobolka Mudug waxaa taliska ciidamadda Soomaaliya sheegeen in lagu dilay in ka badan 50 dagaalame Al-Shabaab ah, wallow maleyshiyadda ay gaashaanka ku dhufatay sheegashadaas.

GAROWE ONLINE