China oo $60 billion ugu deeqay Africa

Caalamka
By Wariyaha Arrimaha Caalamka , GAROWE ONLINE
Madaxweyne Xi oo ka hadlayay Shirka 2018 FOCAC.

BEIJING - Madaxwaynaha China, Xi Jinping ayaa shaaciyay in dalkiisa uu 60 billion oo dollar ugu deeqay dalalka ku yaalla Qaaradda Africa, xilli maanta magaalada Beijing uu ka furmay Shirka madasha Iskaashiga Africa iyo China.

Xi, oo khudbada ka jeediyay furitaanka shirka, ayaa sidoo kale daboolka ka qaadey in China ay ka cafinayso deymaha dalalka saboolka ah ee Africa, islamarkaana ay qaaradda ka fulin doonto 50 mashruuc.

Waxa uu sidoo kale balan-qaadey Madaxweynaha China in dowladdiisa ay sameynayn doonto sanduuq loogu tala-galay in lagu taageero nabadda iyo amaanka Africa, iyadoo taageero military u fidin doonta dalalka u baahan.

Shirka Iskaashiga China iyo Qaaradda Afrika oo ay kasoo qayb galeen inta badan hogaamiyaasha Afrika ayaa socon doona labo maalmood, waxaana Soomaaliya ku matalaya Madaxweyne Farmaajo iyo wafdi uu hogaaminayo.

Xi Jinping oo maalmo kahor mar uu la kulmay Farmaajo u sheegay in China ay diyaar u tahay maalgashi inay ku sameyso Soomaaliya, balse laga doonayo in marka hore uu nabadeeyo dalka, oo qeybo kamid ah Kooxda Al-Shabaab maamusho.

Taageeradda maaliyadeed ee uu China siinayo Africa ayaa lagu tilmaamay inay tahay mid uu ku kasbanayo kalsoonida dowladaha dalalka ku yaalla qaaradda iyo shacabkooda, maadaama uu tartan kula jiro Mareykanka iyo wadamo kale.

GAROWE ONLINE

Wararkii ugu dambeeyey