Sept 23, 2014 (GO)- Meydka nin Soomaali ah oo ku dhex gubtey gaari uu watey ayaa laga helay meel saddex saac u jirta magaalada St. Cloud oo ku taal gobolka Minnesota ee dalka Maraykanka.

Ninka geeriyoodey oo lagu magacaabi jirey Axmed Faarax, waxaa la waayey Sabtidii lasoo dhaafay kadib markii uu xaaskiisa u sheegay inuu magaalada dibadda uga bixi doono si uu usoo hawo gedisto.

Booliska ayaa gelinkii dambe ee shalay oo Isniin ahayd helay medka Axmed Faarax oo ku dhex gubtay gaarigii uu ku safrayey. Faah faahin kama bixin boolisku sababta keentay geerida waxayse sheegeen inay weli baaritaan wadaan.

Qaar kamid ah ehelada ninkan oo la hadlay Idaacadda VOA ayaa sheegay in maalmihii u dambeeyey uu ka sheeganayey xanuun dhabarka ka hayey iyo wareer.

Magaalada St. Cloud oo kamid ah magaalooyinka ugu dadka badan gobolka Minnesota waxaa ku nool kumannaan qof oo Soomaali ah.

GAROWE ONLINE.