Milatariga Soomaaliya oo degaan muhiim ah "ka sifeeyay" Al-Shabaab

Wararka
By WARIYAHA KISMAAYO , GAROWE ONLINE

KISMAAYO, Soomaaliya – Ciidamada Soomaaliya oo ay wehliyaan kuwa Jubbaland ayaa saacado Al-Shabaab ka qabsadey tuulada Koban oo dhacda waqoyga degaanka Sunguuni ee duleedka Kismaayo, maanta oo Isniin ah.

Illo wareedyo ayaa ku waramaya in hal dagaalame oo Al-Shabaab uu ku dhintay iska hor-imaad labada dhinac dhex-maray.

Wararka ayaa intaasi ku daraya in wiil 12-jir ah uu ku dhaawacmey is-rasaaseynta kaasi oo haatan la daaweynayo.

Saraakiisha ammaanka ayaa laga soo xigtay iyaga oo ku eedeynaya kooxda gacan-saarka la leh Al-Qaacida in ay toogashadaasi geysatay.

Taliska ciidamada Jubbaland ayaa intaasi ku daray in laba gaadiid oo ay Al-Shabaab lahayd ay kasoo kaxeysteen goobtaasi wallow aysan ka hadlin waxyeelada dhankooda soo gaaray.

Al-Shabaab wali kama aysan hadlin dagaalkaasi.

Dhankale, milatariga ayaa ku waramaya in ay qorsheynayaa in ay u ruqaan-sanayaan dhinaca degaanka Dhanaane iyo tuulooyin kale oo u dhaxeeya magaalooyinka Muqdisho iyo Marka.

Sabtidii ayay ahayd markii, ciidamada uu Mareykanka tababaray ee Danab ay la wareegeen degaanka Ceel-Saliin oo u dhaxeeya tuulooyinka K-50 iyo K-60 ee gobolka Shabeellaha Hoose.

GAROWE ONLINE

Wararkii ugu dambeeyey