Garoon casri ah oo magalada Garowe laga hirgaliyay

November 5, 2014 (GO)- Magalo madaxda Puntland ee Garowe ayaa laga hirgaliyay markii labaad garoon qaab casri ah u dhisan oo lagu ciyaaro kubadda cagta iyo tan gacanta.

Garoonkan ayaa lagu magacaabaa Classic Stadium & Fitness Center waxana hirgaliyay Axmed Jaamac Jowle oo ka mid ah ganacsatadda Puntland.

Furitaanka xaruntan waxaa kasoo qayb galay madaxwayne ku xigeenka Puntland, Afhayeenka Baarlamaanka, wasiiro iyo xildhibaano, waxana xariga ka jaray Eng.Cabdixakiin Cabdilaahi Camay.

Mulkiilaha xaruntan Axmed Jowle ayaa sheegay xaruntan inay ka kooban tahay saddex qaybood oo kala ah kubadda cagta, tan gacanta iyo xarun lagu jimicsado oo uu ku dhan yahay qalabkii.

Waxa uu Jowle tilmaamay barnaamijkan inuu qayb ka yahay hormarinta Sports-ka Puntland iyo dhiirigalinta xirfad-leyda ciyaar toyda ah, wuxuna ugu baaqay dhalinyaradda inay ka faa'iidaystaan.

Madaxwayne ku xigeenka Puntland Cabdixakiin Cabdilaahi Camay ayaa boggaadiyay Axmed Jowle iyo kooxdiisa sida wanaagsan ee ay go'an tahay hormarinta caasumadda, ganacsatadda kale ayuu ugu baaqay inay ku daydaan tilaabadda uu Axmed Jowle qaaday.

In ka badan 80-kun oo doolar ayaa gashay dhismaha iyo qalabeynta xaruntan, waana tii labaad oo laga hirgaliyo magalo madaxda Puntland ee Garowe.

GAROWE ONLINE