Puntland: Daacish oo weerar ku qaadey saldhig ciidan
-
WARIYAHA BOOSAASO GAROWE ONLINE
- Posted On 12-01-2023, 02:33PM
BOOSAASO, Puntland - Degmada Bali-dhidin ee gobalka Bari ayaa habeenkii xalay ahaa waxaa la weeraray saldhig ciidanka Puntland ay halkaasi ku leeyihiin iyada oo uu weerarka ka dhashay khasaare kala duwan.
Taliyaha qaybta booliska gobalka Bari ee Puntland, Cabdulqaadir Jaamac Dirir oo la hadlay laanta Afka Soomaaliga ee VOA, ayaa sheegay in kooxda Daacish ay ka dambeysay weerarkaas.
"Weerarka waxaa soo qaaday kooxda Daacish. Ciidanka waxaa ka shahiiday hal askari, dhinacooda hal nin oo aan u malaynayo in uu ajnabi yahay ayaa kaga dhintay," ayuu yiri.
Waxa uu intaas raaciyey hadalkiisa: "Ninku wuxuu wataa qalabka miino baarka". Hase ahaatee, taliyaha ma shaacin magaca sarkaalkaas iyo waddanka uu kso jeedo.
Dagaalka ayaa markii hore bilawday lix saac oo habeenimo iyada oo taliyuhu sheegay in Daacish ay soo rogaal celiyeen mar labaad isla markaana la isla gaaray 03:00 AM ee xiliga danbe.
Dhawr bil kahor ayay ahayd markii dabley hubeysan ay dileen gudoomiyaha degmada Bali-dhidin, Mohamed Ahmed Muumin. Xubnaha ISIL ayaa waxay ku dhuumaaleystaan degaanada buuraleyda ah ee gobolka Bari.
GAROWE ONLINE
