Puntland oo fasaxday Maxaabiis u dhashay Iiraan [Daawo]
-
WARIYAHA GAROWE ONLINE BOOSAASO
- Posted On 10-05-2018, 04:41PM
BOOSAASO, Puntland- Maxkamadda sare ee dowladda Puntland ayaa maanta xorriyadoodii u celisay 17 maxbuus oo kasoo jeeda waddanka Iiraan kuwaasoo lagu soo eedeeyay inay sifo sharci darro ah uga Kalluumaysanayeen xeebaha Puntland.
Maxkamadda ayaa dadkan sii daysay kadib markii maanta ay u fariisatay dhagaysiga Gal-dacwadeed ka dhan ah Iiraaniyiintaas oo horay kiiskooda loo soo mariyay Maxkamadda Darajada 1aad ee gobolka Bari.
Gudomiye Ku Xigeenka Maxkamada Sare ee Puntland Nuur Ciise, ayaa sheegay in Maxkamadda sare ay jabisay xukunkii horay loogu riday eedaysanayaashaas isagoo amar ku bixiyay in dib loogu soo celiyo xorriyadooda.
Guddoomiyaha ayaa sidoo kale xusay in Doontii ay ku kalluumaysanayeen raga la sii daayay loo xukumay dowladda Puntland maadama ay sifo sharci ah kusoo gashay waddanka Khayraadkiisana ku qaadanaysay.
Darawalkii waday Doonta Al-Saciidiyah, Xaydar Cabdallah, oo ku dhintay howlgalkii lagu soo qabtay ragga la sii daayay 05 bishii 10aad 2017, ayaa magtiisa dusha uga tuuray mulkiilaha Doontan oo lagu magacaabo Caarif Sabiil.
Maxabiistan ayaa magaalada Boosaaso ku xirnaa muddo sideed bilood ah, waxaana maxkamadda Darajada 1aad ee gobolka Bari ay ku xukuntay Xabsi iyo ganaax lacageed taasoo ay maanta jabisay Maxkmadda Sare.
GAROWE ONLINE
