Puntland oo ku dhawaaqdey kiisas cusub oo ah Coronavirus

Image

GAROWE, Puntland - Guddiga wacyi-gelinta iyo ka hortagga faafitaanka Coronavirus ee Puntland ayaa ku dhawaaqay in ay soo kordheen shan kiis cusub oo ah fayruska dilaaga ah ee Corona.

Jaamac Faarax Xasan, wasiirka caafimaadka oo guddiga ka tirsan kaasoo la hadlay warbaahinta, ayaa afar kamid ah bukaanada cusub ku sheegay rag, qofka kelana waa dumar.

Natiijada baairtaankan ayaa kasoo baxday tijaabo lagu sameeyay sheybaarka lagu ogaado caabuqa ee laga hirgeliyey Puntland kaasoo yaala magaalada Garowe.

Sidda laga soo xigtay wasiir Xasan, qaar kamid ah shaqsiyaadka laga helay caabuqa ayaa xiriir la sameeyay qofkii ugu horeeyay ee uu soo ritay xanuunkaas safmareenka ah.

"Dhamaantooda xiriiradooda waa la hayaa, waana lala socdaa dhaqdhaqaaqooda," ayuu wasiirku raaciyey hadalkiisa intii lagu guda jiray shirka jaraa'id ee uu qabtay caawa.

Shanta qof ee ay Puntland xaqiijisay in ay ka heshay fayruska oo tirada guud ka dhigeysa lix ayaa kamid ahaa 11 ruux oo maalmihii lasoo dhaafay la baarey lana sugeyay natiijadooda.

Sidda ku xusan warbixinta guddiga, dhamaantooda ma aysan gelin wax safar ah saddexdii bilood ee lasoo dhaafay, taas oo macnaheedu yahay in dalka gudahiisa lagu qaad-siiyey.

Ugu dambeyntii, guddiga ayaa cod dheer kaga codsaday dadweynaha Puntland in ay muujiyaan feejignaan dheeraad ah iyo in ay ka qeyb-qaataan Sanduuqa Taakulada iyo ka hortagga caabuqa.

GAROWE ONLINE

Related Articles

Booliska Puntland oo lagala hadlay ka hortaaga xaalufinta deegaanka

Isku xirnaanta Wasaaradda Degaanka iyo Isbedelka Cimilada iyo Hogaanka Booliska ayaa sidoo kale looga hadlay shirkan.

  • Puntland

    27-03-2024

  • 04:28AM

Qardho: Mashruuc horseeday jarista dhir baaxad leh oo laga digay

Wasaaradda deegaanka iyo Isbedelka Cimiladda ee Puntland ayaa ku baaqdey in degdeg loo joojiyo jarista dhirtan.

  • Puntland

    26-03-2024

  • 01:41PM