Qarax khasaaro sababay oo ka dhacay duleedka Boosaaso

Puntland
By Wariyaha Boosaaso , Garowe Online
Ciidamada Puntland oo ku jira difaaca hore ee Galgala [Sawir hore]

BOOSAASO, Puntland - Qarax miino ayaa maanta oo Talaado ah ciidamo katirsan dowladda Puntland waxaa lagula eegtay duleedka magaalada ganacsiga Puntland ee Boosaaso.

Sarkaal katirsan ciidamada Puntland oo ku sugan gobolka Bari ayaa u xaqiijiyay warbaahinta in hal Askari uu ku geeriyooday, saddex kalena ay ku dhaawacmeen qarax oo ka dhacay meel ku dhaw Galgala.

Miinada oo la dhigay jidka isku xira magaalada Boosaaso iyo Tuulada Galgala ayaa waxay haleeshay gaari nooca dagaalka ah oo ay la socdeen ciidamo ka tiran kuwa Puntland.

Ciidamada qaraxa lala eegtay ayaa kusii jeeday magaalada Boosaaso, iyagoo saaka kasoo ambabaxeen Galgala, halkaasi oo ciidamada Puntland iyo Al Shabaab ay isku hor-fadhiyaan.

Sarkaalka ayaa intaasi ku daray in askartii dhaawaca kasoo gaaray weerarka la dhigay xaruumaha caafimaadka ee ku yaalla magaaladda Boosaaso.

Ma jirto cid sheegatay qaraxan, balse dhulka buuraladeyda Galgala ayaa waxaa sanadihii la soo dhaafay uu dagaal ku dhex marayey ciidamada Puntland iyo Kooxda Al-Shabaab.

Qaraxyada noocan ah ee ciidamada Puntland lagula eeganayo aaga Galgala ayaa mudooyinkii dambe sii kordhayay, iyadoo Al Shabaab sidoo kale sare u qaadey dilalka ay ka fulinayso magaalada Boosaaso.

GAROWE ONLINE

Wararkii ugu dambeeyey