May 30, 2015 (GO)- Saddex degmo oo cusub ayaa lagu soo daray degmooyinka uu ka shaqeeyo Barnaamijka Horumarinta Degmooyinka Puntland ee Qaramada Midoobey taageerto (JPLG), waxayna taasi toban ka dhigeysaa tirada guud ee dogmooyinka mashruucaas nasiibka u yeeshay.

Agaasimaha Guud ee Wasaaradda Arrimaha Gudaha Puntland Maxamed Cali Faarax ayaa sheegay in degmooyinka Qandala, Buurtinle iyo Galdodob; oo ka kala tirsan gobollada Bari, Nugaal iyo Mudug sanadkan ay kusoo biirayaan degmooyinka u uka shaqeeyo mashruuca JPLG.

Go'aankan ayaa kasoo baxay shirka lix-biloodlaha ah ee lagu qimeeyo horumarka mashruucan, shirkaas oo dhowaan kusoo gaba gaboobey magaalada Addis Ababa ee xarunta dalka Ethiopia.

Mashruucan oo ay maal geliyaan hay'adaha UNDP, UN-HABITAT, UNCDF, ILO iyo UNICEF oo taageero ka helaya dalalka Sweden, USA, Italy, Norway iyo Denmark, wuxuu soo bilowdey sanadkii  2008, wuxuuna horay uga shaqeyn jirey degmooyinka Boosasso, Garowe, Qardho, Gaalkacayo, Bayla, Eyl iyo Jirriiban.

GAROWE ONLINE