Shacabka Garowe oo si adag uga falceliyey hadalkii Goodax Bare

Puntland
By WARIYAHA GAROWE , GAROWE ONLINE

GAROWE, Puntland – Dadweynaha ku dhaqan magaalo madaxda dowlada Puntland ee Garowe ayaa si kulul kaga falceliyey hadalkii kasoo yeeray Wasiirka Waxbarashada Soomaaliya, Cabdullaahi Goodax Bare.

Shacabka oo la hadlay warsidaha Garowe Online ayaa muujiyey dareenkooda ku aadan sida ay uga xun yihiin erayadaas.

Qaarkood oo ku tilmaamay "mid khalad ah" ayaa ku booriyey wasiirka in uu ka laabto isla markaana "raali gelin buuxda uu bixiyo".

Muwaadiniin kale ayaa soo jeediyay in "khilaafka taagan" ay wada-hadalo ka galaan dowladda federaalka iyo Puntand "si loo badbaadiyo mustaqbalka dhalinyaradda iyo ardayda gudaha wax ku baratay".

Goodax Bare, oo sidoo kale ka tirsan Aqalka Hoose ee baarlamaanka dalka, ayaa ku adkeystay "Puntland waa in ay galaan Imtixaanka ama isku filnaadaan oo aysan shahaado soo doonan".

Hadalkaas ayuu sheegay xili uu wareysi siiyey Talafishinka BBC-da oo wax ka waydiiyey muranka ka taagan dhanka shahaadooyinka.

Mas'uuliyiinta Puntland oo aan wali si rasmi kaga jawaabin go’aanka xukuumada federaalka ah ayaa horey u sheegay in dastuurka qabyada ah uu u ogolaanayo in ay si gaar ah u maamushaan arrimaha waxbarashada.

MUUQAALKA SHACABKA

GAROWE ONLINE

Wararkii ugu dambeeyey