Taliyihii Saldhiga Galdogob oo lagu dilay Bur-saalax

GALDOGOB, Puntland- Taliyihii Saldhiga Booliiska degmada Galdogob ee gobolka Mudug, Cabdixamiid Warsame, ayaa lagu dilay weerar ka dhacay degmada Bur-saalax ee isla gobolkaas, waxaana ka dambeeyay ciidamo katirsan Booliiska Puntland oo ku sugnaa halka weerarku ka dhacay.

Taliyaha ayaa xalay lagu dilay goob dhowr KM u jirta Bur-saalax waxaana weerarkaas ku dhaawacmay saddex kamid ah ciidamada Puntland, sida uu warbaahinta gudaha u xaqiijiyay Guddoomiyaha Galdogob, Xasan Faarax Ayaxle.

Guddoomiyaha gobolka Mudug iyo mas'uuliyiin katirsan dowladda ayaa gaaray Bur-saalax, kuwaasoo ku guda jira baaritaan lagu samaynayo dhacdadaas.

Sida wararku sheegayaan lama aasin marxuumka, waxaana hadda socda dedaalo ku aadan sidii gacanta loogu soo dhigi lahaa dablayda ka dambaysay dhacdadan.

Guddoomiye Ayaxle, ayaa xaqiijiyay in gacanta lagu dhigay 4 kamid ah ciidamadii ka dambeeyay weerarka lagu dilay Taliye Cabdixamiid.

Warar kala duwan ayaa kasoo baxaysa sababta lagu dilay Taliyahaas, waxaana mas'uuliyiinta gaaray Bur-saalax warbaahinta u sheegeen in laga shakiyay taliyaha gaari uu watay, sidaas darteed Askar joogtay Kantarool ay ku fureen rasaas taasoo sababta geerida marxuumka.

Dhinaca kale, warar ayaa sheegaya in dilka taliyaha ay ka dambeeyeen askarta katirsan ciidanka Booliiska ee gacanta lagu dhigay iyo kuwo lagu raad joogo, kuwaasoo bixiyay warbixin khaldan oo la xariirta gaariga taliyaha, kuwaasoo sheegay inay baaburka ay saaranyihiin xubno baxsad ah oo katirsan ururka Al Shabaab.

Balse, Guddoomiyaha gobolka Mudug, Xassan Maxamed Khaliif, ayaa tilmaamay in baaritaanka kadib wixii dhacdadaas la xariira ay warbaahinta usoo gudbin doonaan.

GAROWE ONLINE