Weerar ka dhacay Boosaaso iyo wararkii ugu dambeeyay
-
Wariyaha Muqdisho GAROWE ONLINE
- Posted On 22-11-2018, 10:33AM
BOOSASO, Puntland - Dabley hubeysan ayaa xalay weerar ka fuliyay Boosaaso, oo ah magaalad Ganacsiga Puntland iyo xarunta gobolka Bari, halkaasi oo mudooyinkii dambe ay kusoo kordhayeen weerarada kooxaha argagxisada Al-Shabaab iyo Daacish.
Weerarkii xalay ayaa lagu dhaawacay Garsoore katirsan Maxkamadda Sare ee Puntland, oo lagu magacaabo Saciid Cabdi Muumin, sida ay Saraakiil katirsan Booliska Boosaaso u sheegeen Warsidaha Garowe Online.
Kooxda falkaasi geysatay ayaa lagu soo waramayaa inay goobta ka baxsatay, iyadoo aan jirin illaa hadda cid sheegatay ms'uuliyadda weerarka, balse waxaa socda baaritaan ay wadaaan ciidamada amniga.
Boosaaso ayaa kamid ah goobaha ugu amniga xun Puntland, iyadoo ay ka dhacayaan falal lidi ku ah amniga iyo xasiloonida oo ay fulinayaan Al-Shabaab iyo Daacish oo ka howlgala magaalada.
Xukuumadda Madaxweyne Cabdiweli Gaas, oo hadda waqtigu ka dhamaaday ayaa mudadii ay jirtay lagu eedeeyay inay ku fashilantay hanashada amniga Puntland, oo ay kusoo xoogeysteen kooxaha argagaxisada.
Intii Gaas uu xafiiska joogay, weeraro aan horey Puntland uga dhicin, oo taariikhda baal madow ka galay ayay Al-Shabaab ka fulisay Puntland 2017 iyo 2018, gaar ahaan Af-Urur iyo Balli Khadar oo katirsan gobolka Bari, kuwaasoo lagu dilay askar badan.
GAROWE ONLINE
