Sababta uu taliyaha ciidanka difaaca Kenya u tegay Jubbaland

Wararka
By WARIYAHA NAIROBI , GAROWE ONLINE
Kormeerkan ayaa kusoo aadaya isbuuc kadib is-miidaamintii dadka badan lagu laayey iyo xiisad taagan.

NAIROBI, Kenya – Taliyaha Ciidanka Difaaca dalka Kenya ayaa socdaal aanan horey loosii qorsheyn loona shaacin waxa uu ku yimid gudaha Soomaaliya, gaar ahaan degaanadda Jubbaland.

Sidda ku cad war-saxaafadeed kasoo baxay taliska xoogaga wadankaasi, Jeneraal Walter Raria ayaa kormeeray saraakiisha kaga sugan dalka leh xeebta ugu dheer Afrika.

Ciidanka Kenya ee waddanka jooga oo qayb ka ah howlgalka Midowga Afrika ee AMISOM ayaa badankooda ka howlgala degaanada Jubbooyinka.

Bayaanka oo aanan lagu caddeynta goorta uu safarkan ku yimid taliyaha ayaa lagu ujeedka safarkiisa "dhiirogelinta iyo waayo-aragnimo la wadaagid".

"Wuxuu waqti ula soo qaato si uu ugu dhiirogeliyo shaqadooda iyo inuu la wadaago khibradiisa halkaasi," ayaa lagu yiri qoraalka oo uu arkay warsidaha Garowe Online.

Booqashadan ayaa waxay imaaneysaa todobaad kadib weerarkii dhimashada badan dhaliyey ee huteelka Kismaayo, halkaasi oo ku dhowaad 30 ruux lagu dilay.

Dhacdadaasi ayaa waxay noqoneysaa midii ugu dhimashada badneyd oo ay Al-Shabaab ka geysato magaaladaasi dekadda leh tan iyo markii laga xoreeyay 2012-kii.

Si lamid ah kormeerkan ayaa wuxuu kusoo beegmayaa iyadda oo ay xiisad dhanka badda ah u dhaxeyso Soomaaliya iyo Kenya, taasi oo hortaala Maxkamad.

Xeer-beegtadda Cadaaladda Caalamiga ah – ICG – ayaa waxaa lagu wadaa in ay bisha September ee sanadkan 2019 ay dib u bilowdo dhageysiga gal-dacwadeedkaas.

Ciidamada Kenya ayaa ciida Soomaaliyeed cagta soo geliyay sanadkii 2011-dii si ay uga sugaan amniga wadankooda, iyaga oo aanan qeyb ka ahayn howlgalka AMISOM oo ay gedaal uga biireen.

GAROWE ONLINE

Wararkii ugu dambeeyey