BELED-XAAWO- Al-Shabaab ayaa degmada Belad-Xaawo ee gobolka Gedo ku gawrcday Nabadoon caan ah, oo magaciisa lagu sheegay Dhaqane Qaasim Amiin, sida ay xaqiijiyeen mas'uuliyiinta amniga.

Dhaqane War-cadde oo dhowaan kasoo laabtay magaalada Doolow ee isla gobolka ayaa lagala soo baxay hoygiisa xalay oo Arbaco ahayd, taasi oo ka dambeysay markii ay Shabaab saacado la wareegtay magaalada.

Ma cadda sababta ka dambeysa inay Al-Shabaab qoorta ka jarto Oday dhaqameedkaan, balse wararka ayaa sheegaya in marxuumka uu ahaa shaqsi kasoo horjeeda fekerka kooxdan cilaaqaadka la leh Al-Qaacida.

Dhinaca kale, warar dheeri ah ayaa kasoo baxay dagaal culus oo ciidamada dowlada iyo xoogaga Al-Shabaab ku dhexmaray Belad-xaawo oo ku taala Xadka Soomaaliya iyo Kenya ee gobolka Gedo.

Saraakiisha ciidanka xooga dalka ayaa sheegay inay dileen xubno ka tirsan Shabaab, iyagoo qiray in dhankooda uu jiro khasaaro, wallow ay ka gaabsadeen inay fahfaahin dheeri ah ay ka bixiyaan.

Ma jiro war ay Al-Shabaab kasoo saartay dhacdooyinkaan saacadihii lasoo dhaafay ka dhacay degmada Belad-xaawo oo kamid ah magaalooyinka hoostaga maamul goboleedka Jubbaland.

Arrimahaan ayaa kusoo aadaya xili dhowaan maamulka degmada uu amar kusoo rogay Haweenka degan magaalada ee u dhaxa ragga ka tirsan Al-Shabaab oo ay fareen inay isaga baxaan magaalada.

GAROWE ONLINE