AMISOM oo walaac ka muujisay war kasoo baxay Mareykanka

Soomaliya
By Wariyaha Muqdisho , Garowe Online

MUQDISHO, Soomaaliya - Howlgalka Midowga Afrika ee Soomaaliya [AMISOM] ayaa walaac ka muujiyay go'aanka Mareykanka ee ah inuu dhimayo Ciidamada ka jooga dalka, xilli Al-Shabaab ay kordhisay weerarada.

Taliyaha Ciidanka Uganda ee Soomaaliya, ahna taliyaha joogtada ah ee AMISOM, Paul Lokech, ayaa ka digay in Mareykanka uu Ciidamadiisa la baxo, isagoo xusay in dhabar-jab ku noqon doonto howlgalka hadii hal dhinac uu faarujiyo kaalintiisa.

Taliyaha ayaa tilmaamay in dhamaan dalalka hadda qeybta ka ah howlgalka ay yihiin kuwa door fir-fircoon ku leh dadaalabada nabadda soo celinta xasiloonida Soomaaliya, islamarkaana hadii mid kamid ah uu baxo aanan la helayn cid buuxisa.

"[Dal] walba oo howlgalka qeyb ka ah, wuxuu leeyahay door muhiim ah. Hadii [Dal] uu faarujiyo booskiisa, lama helayo cid buuxisa booskaas," ayuu Paul Lokech, usheegay Wargeys kasoo baxa Mareykanka.

Howlgalka Midowga Afrika ee Soomaaliya [AMISOM] oo dalka yimid sanadkii 2007-dii, ayaa wajahaya dhaleeceyn xoog leh, oo ku saabsan inaysan gaarin yoolkii iyo hadafkii dalka loo keenay ee ahaa in Al-Shabaab dalka laga xureeyo.

Tirada Ciidamada AMISOM oo lagu sheegay 22,000 oo Askari ayaa waxaa la qorsheynayaa inay dalka ka baxaan 2020-ka, iyagoo mas'uuliyadda amaanka goobaha ay hadda gacanta ku hayaan ku wareejinaya Ciidamada Soomaaliya.

Deeq-bixiyaha ugu badan ee lacagta siiya AMISOM waa Midowga Yurub, oo hadda wada dib u eegis uu ku sameynayo taageerada uu siiyo howlgalka lamana saadaalin doono go'aanka ay qaadan doonan.

GAROWE ONLINE

Wararkii ugu dambeeyey