Axmed Madoobe oo magacaabay madaxweyne ku xigeenada Jubaland

KISMAAYO, Jubbaland - Madaxweynaha Jubbaland, Axmed Maxamed Islaam ayaa maanta Talaado 22 Oktoobar 2019 wuxuu wareegto ku magacaabey labadiisa ku xigeen.

Maxamuud Sayid Aadan, ayaa laga dhigay Madaxweyne kuxigeenka 1aad ee Jubbaland, halka C/qaadir Xaaji Maxamuud, loo xushay Madaxweyne Kuxigeenka 2aad ee Jubbaland.

Magacaabidan ayaa kusoo aadeysa xili aad loo sugayo hadii Axmed Madoobe uu wax ka bedel ku sameyn doono Golahiisa Wasiiradda oo mid kamid ah uu ku xiran yahay Muqdisho.

Cabdirashiid Janan ayaa tan iyo 1-dii September ku xiran Muqdisho, iyadda oo "loo diiday in uu la kulmay eheladiisa, qareenkiisa iyo adeegyo caafimaad oo uu u baahdey".

Xeer-ilaalinta federaalka ayaa kusoo eedeysay "dilalka shacab" xili maamulkiisa uu qabashadiisa ku sifeeyay "afduub baalmarsan Dastuurka iyo arrin siyaasadeysan".

Jubbaland, Puntland iyo qaar kamid ah xisbiyadda siyaasadeed ee dalka ayaa cod dheer waxay ku dalbadeen in Janan "sida ugu dhaqsiyaha badan loogu soo xorriyadiisa".

Madaxweyne Axmed Madoobe ayaa dib loogu doortay hogaanka Jubaland kadib doorasho ka qabsoontay magaaladda Kismaayo 22-kii bishii August ee sanadkan 2019-ka.

WAREEGTADDA MAGACAABIDA

GAROWE ONLINE