Dab qabsaday xarunta Bangiga Dhexe ee Soomaaliya; khasaaro jira

MUQDISHO, Soomaaliya – Dab la sheegay in uu ka dhashay koronto ayaa xalay qabsaday qeyb kamida xarunta Bangiga Dhexe ee Soomaaliya, sidda uu xaqiijiyey maamulka gobolka Banaadir.

Cumar Maxamuud Maxamed [Cumar Filish], gudoomiyaha gobolka, ayaa tilmaamay in gaadiidka dab-damiska oo waqtigii loo baahnaa ka jawaabay ay yareysay khasaaraha.

Duqa magaalo madaxda dalka dhaca Geeska Afrika oo tegay meesha ay wax ka dhaceen ayaanan daboolka ka qaadey waxyeelada guud ee ka dhashay dabka.

"Dadweynaha waxaan ugu baaqeynaa in ay guryahooda dhigtaan Gaaska Oxygen-ka, si loo yareeyo waxyeelada ka dhalan karta khasaaraha noocaan ah," ayuu hadalkiisu ku daray.

Shaqaalaha dab-damiska ayuu kaga mahadceliyey "naf-hurnimadda" ay muujiyeen iyo in ay si degdeg ah kaga jawaabeen.

Xarunta Bangiga Dhexe ee Soomaaliya oo ku taala degmada Shangaani ayaa ah goob ammaankeeda aad loo sugo mana cadda qaabka dabkaan uu ku kacay.

Warbaahinta maxaliga ah ee Muqdisho ayaa ku warameysa in khasaaraha la xaqiijiyey uu u badan yahay mid hantiyadeed gaar ahaan xafiisyo gubtay iyo qeybo kamid kale oo aad muhiim ah.

GAROWE ONLINE