Diyaarado Duqeyn ku burburiyay Isbitaal iyo Dugsi ku yaalla Saakow [Khasaaraha]
SAAKOW, Soomaaliya - Fahfaahin dheeraad ah ayaa kasoo baxaysa duqeyn dhanka cirka ah oo xalay saqdii dhexe ka dhacay degmad Saakow, ee gobolka Jubbada Dhexe, oo kamid ah meelaha ay ku xoog badan tahay kooxda Al-Shabaab.
Mas'uul katirsan Wasaaradda Warfaafinta Soomaaliya, ayaa sheegay in duqeynta lagu dhaawacay Xasan Yacquub, oo kamid ah hogaamiye-yaasha sare ee Al Shabaab, islamarkaana lagu dilay labo xubnood oo kale, oo uusan magacyadooda sheegin.
Dhanka kale, Xasan Yacquub oo la hadlay warbaahinta ku hadasha afka Al Shabaab ayaa beeniyay inuu ku dhaawacmey weerarka cirka, kaasoo la sheegay inay ku dhinteen saddex carruur ah, kadib markii gantaal uu ku dhacay Dugsi qur'aan ay ka baranayeen.
Sawirro lasoo dhigay baraha Internet-ka Al-Shabaab ku leedahay ayaa lagu soo bandhigay meydadka saddex caruur ah, iyo burbur xoog leh oo gaarey dhismooyin la sheegay inay yihiin Isbitaalka guud ee degmada Saakow iyo Dugsi.
Wali lama oga dalka laga leeyahay diyaaradaha duqeeyay Saakow, balse inta badan waxaa dalka weerarada noocan ah ka geysta dowladaha Mareykanka iyo Kenya, oo diyaarado ku ugaarsada hogaamiye-yaasha Al Shabaab.
Hogaamiyihii Al-Shabaab, Axmed Godane ayaa Mareykanka ku dilay duleedka degmada Baraawe, ee gobolka Shabeellaha Hoose 1-dii September, 2014, kadib markii Gaari uu la socday ay gantaal ku burburisay diyaarad Drone ah.
GAROWE ONLINE