Farmaajo oo xariga ka jaray dhismaha safaaradda cusub ee Mareykanka

WASHINGTON, US - Madaxweyne Farmaajo oo ay weheliyaan Wasiirrada Arrimaha Dibadda, Maaliyadda iyo diblumaasiyiin ayaa xarigga ka jaray dhismaha cusub ee Safaaradda Soomaaliya ka iibsatay ee Washington.

Dhismaha cusub oo ka kooban saddex dabaq ayaa wuxuu ku yaalaa aaga ay safaaraduhu ku badan yihiin ee magaala madaxda dalweynaha Mareykanka ee Ameerika.

"Hirgelinta safaaradda waxay muujineysaa mudnaanta ay dowladdu siineyso soo celnta maaqaamka dalkeennu uu ka lahaa caalamka," ayaa lagu yiri qoraal kasoo baxay Madaxtooyadda.

Farmaajo ayaa ku boorriyay jaaliyadda Soomaaliyeed in ay wada shaqeyn dhaw la yeeshaan diblomaasiyiinta safaaradda, isagoo tilmaamay in dhismahan uu yahay hanti ay leeyihiin shacabka iyo Dowladda.

"Madaxweynaha muujiyey in dowladdu dedaal ku bixineyso dayactirka safaarado kale oo Soomaaliya ay ku leedahay dalal kale," ayaa la raaciyey nuqul kamid ah war-saxaafadeedka.

Sidda uu fahansan yahay warsidaha Garowe Online oo soo xiganaya illo lagu kalsoon yahay, dalalka kale ee safaaadaha loo iibinayo ayaa kala ah; Koonfur Afrika iyo waddanka deriska ah ee Kenya.

Diblomaasiyiinta Soomaaliya ee Washington  ayuu ku tartarsiiyey in ay si siman ugu adeegaan, si dhowna uga warqabaan muwaadiniinta, "muhiimna ay tahay in ay ilaaliyaan midnimadooda iyo wadajirkooda".

GAROWE ONLINE