Madaxii Maxkamadda Al-Shabaab ee Bariire oo la qabtay
-
Wariyaha Muqdisho GAROWE ONLINE
- Posted On 20-03-2019, 10:39AM
MUQDISHO, Soomaaliya - Warbaahinta Dowladda Soomaaliya ayaa sheegtay in Muqdisho lagu qabtey Madaxii Maxkamadda Al-Shabaab ee degaanada Bariire, ee gobolka Shabeellaha Hoose.
Howlgal dhacay maalintii shalay, 19-ka March ayaa lagu soo qabtey Sarkaalkan, oo aysan dowladda wali magaciisa shaacin.
Dhanka Al-Shabaab wali ma jirto wax war ah oo kasoo baxay oo ku saabsan qabashada Madaxii Maxkamadda Bariire.
Ciidamada amniga ayaa todobaadkan ku qabtey meel ku dhaw Garoonka diyaaradaha Muqdisho labo xubnood oo midkooda Al-Shabab u qaabilsanaa dilalka iyo fududeynta qaraxyada, sid ay sheegtay dowladda.
Warar ayaa sheegaya in hogaamiyeyaasha Al-Shabaab ayaa soo galeen intooda badan degmooyinka Muqdisho iyagoo kasoo baxsanaya duqeymaha Mareykanka ee gobollada Koonfur Soomaaliya.
Sirdoonka DF ayaa lagu dhaliilay gaabis dhanka helida xogaha ku aadan dhaq-dhaqaaqyada Al-Shabaab iyo weerarada ay gudaha Muqdisho ku maleegaan.
GAROWE ONLINE
