Madaxweyne Waare oo xilka ka qaaday Gudoomiyaha Hiiraan

Soomaliya
By Wariyaha Muqdisho , Garowe Online

BELEDWEYNE, Soomaaliya - Madaxweynaha maamulka HirShabeelle Maxamed Cabdi Waare ayaa xilka ka qaadey gudoomiyihii gobolka Hiiraan, Cali Jeyte Cismaan.

Digreeto kasoo baxday Xafiska Madaxweynaha ayaa lagu shaaciyay xilka qaadista gudoomiyaha, iyadoo loo cuskaday go'aanka inuu ka gaabiyay howlihii loo igmaday, sida amniga iyo arrimaha bini'aadanimo.

Cali Jeyte ayaa dhawaan diiday xilka qaadistan oo uu ku sameeyay Wasiirka Arrimaha Gudaha maamulka HirShabeelle, waxaana ka diidmadiisa ka dhashay ismariwaa keenay inuu soo faregliyo Madaxweynaha oo isaga xilka ka qaado.

Cabdullaahi Axmed Maclin, ayaa loo magacaabay xilka gudoomiyaha gobolka Hiiraan.

Isbedelkan dhanka hogaanka gobolka Hiiraan ayaa yimid kadib markii Madaxweyne Waare iyo Wasiiro katirsan maamulkiisa oo ku sugan Beledweyne ay kulamo wadatashi ah la qaateen qeybaha bulshada.

Madaxweynaha HirShabeelle ayaa tan iyo markii la doortay sandkii tagey waxa uu sameeyay dhowr xilka qaadis, oo uu ku sameeyay gudoomiyaal degmooyin iyo mas'uuliyiin heer gobol ah.

GAROWE ONLINE

Wararkii ugu dambeeyey