MUQDISHU, Somalia - Waxaa maanta oo Isniin ah dib usoo laabtey adeegga Internet-ka Koonfurta iyo bartamaha dalka Somalia, oo uu ka maqnaa tan iyo bishii June 25.

Adeeggan maqnaashihiisa waxa uu saameyn ku yeeshay Howlaha iyo Shaqooyinka Hay’daha, xafiisyada dowladda, Shirkadaha Ganacsiga , Xawaaladaha iyo Dadka shacabka ah oo aad ugu tiirsanaa.

Cillada ayaa timid markii uu Markab MSC Alice, oo la sheegay in laga leeyahay dalka Switzerland uu jaray Fiilada Fiber Optic-ga ee marta badda hoosteeda, gaar ahaan meel ku dhaw magaalada Muqdishu.

Ganacsatada Koonfurta Somalia ayaa khasaarey 23 Million oo Doolar, mudadii uu maqnaa Internet-ka.

Dowladda Federaalka ayaa ayaa xirtey Markabka Ganacsi ee jaray fiilada Internet-ka, kaasi oo laga dalbadey inuu bixiyo lacag mag-dhaw ah, inkstoo Shirkada markabka ay diiday eedayntaasi.

GAROWEONLINE