Kursi ka banaanaa Baarlamaanka oo lagu doortay Kismaayo
KISMAAYO, Soomaaliya - Waxaa saaka magaalada Kismaayo lagu doortay Kursi kamid ah Kuraasta ka banaan Gollaha Shacabka ee Baarlamaanka Federaalka Soomaaliya.
Kursiga oo lahayd Beesha Hubeer ayaa waxaa ku guuleystay Maxamuud Cabdullaahi Siraaji, oo la dhashay Cabaas Siraaji, Wasiirkii Howlaha Guud oo lagu dilay bishii May, 2017 nawaaxiga Villa Soomaaliya.
Maxamuud ayaa helay 50 cod wareegga kowaad, isagoo ka guuleystay musharax lagu magacaabo Fardowsa Xuseen Maxamed oo heshay hal cod, sida ay ku dhawaaqday Xaliima Yareey, Gudoomiyaha Gudiga Madaxa-banaan ee Doorashada.
Kursiga maanta la doortay ayaa banaanaa tan iyo markii la dilay Cabaas Siraaji sanadkii tagey. Askarigii dilay Cabaas oo dil toogasho ah lagu xukumay ayaan wali lagu fulin xukunkaasi.
Labo Kursi oo kale oo ay ka kala geeriyoodeen Bootaan Ciise Caalin oo deegaan doorashadiisu ay tahay Galmudug iyo Saciid Xasan Geedi, oo isna Deegaan Doorashadiisa ay Somaliland tahay.
GAROWE ONLINE