Madaxweynaha Koonfur Galbeed oo Baraawe tagay
BARAAWE, Somalia- Madaxweynaha maamulka Koonfur Galbeed Somalia Shariif Xasan Sheekh Aadan iyo wafdi uu hogaaminayo ayaa gaaray degmada Baraawe ee gobolka Shabeellaha hoose.
Safarka Shariif Xasan ayaa salka ku haya dhawr arrimood oo ay ugu muhiimsantahay xarig jarka xarunta madaxtooyada maamulkaasi iyo garoonka diyaaradaha.
Dadka ku nool degmada Baraawe ayaa soo dhaweyn u sameeyay mas'uuliyiinta iyadoo la filayo inuu kulamo la qaato shacabka qaybahiisa kala duwan.
Madaxweynaha Koonfur Galbeed ayaa la hadlay dadkii soo dhaweeyay, wuxuuna sheegay inuu ku faraxsanyahay imaanshihiisa Baraawe,wuxuuna shacabka u sheegay inay dowladdu la joogi doonto maadama xarigga laga jarayo xaruntii ay ku shaqayn lahaayeen.
Degmada Baraawe ayaa xarun u ah maamulka Koonfur Galbeed, waxaana la filayaa inay usoo wareegaan maadama ay muddo gacanta ugu jirta Al Shabaab, balse sannadkii 2014 laga xoreeyay.
Waxaa muddoonkii dambe magaalo xeebeedka Baraawe ka socday dhismayaal kala duwan maadama dadka deegaanka saadilanayeen inay xukuumaddu usoo wareegto maadama ay si KMG ah ugu shaqayn jirtay magaalada Baydhabo xarunta gobolka Baay.
Muddo kooban ayaa wafdigan ku sugnaan doonaan magaalada Baraawe iyadoo indho indhayn lagu samayn doono xaaladda amni iyo midd dhaqaale ee degmada.
GAROWEONLINE