JOWHAR, HirShabelle – Ugu yaraan hal qof ayaa ku dhintay, sideed kelana waxaa kasoo gaarey dhaawac kadib qarax ka dhashay Miino uu Sabtida maanta ah ka dhacay caasimada HirShabelle ee Jowhar.

Shaqsiyaadka loola cararay isbitaalada ayaa waxaa kamid ah mas'uuliyiin, sidda ay xaqiijiyeen saraakiil dhanka ammaanka ah.

Xildhibaan Sakariye Muumin Hilowle iyo agaasime ku xigeenka Madaxtooyadda, Cabdiqaadir, ayaa lagu sheegay in xaaladooda caafimaad lagula tacaalayo Isbitaalka guud ee magaalada.

Ma cadda bartilmaameedka weerarkaas. Hase ahaatee, waxaa goobta ay wax ka dhaceen inta badan fadhiista madaxda maamulka.

Meesha uu falku ka dhacay oo ah boosteejada gaadiidka Muqdisho iyo Jowhar waxaa sidoo kale ku caweeya taliyeyaasha ciidamada, Xildhibaanada iyo qaar kamid ah madaxda dowlad goboleedka.

Maleeyshiyaadka Al-Shabaab ee gacansaarka la leh shabakada argagixisada ah ee Al-Qaacida ayaa lagu eedeeyay dhacdadaas.

Taliska Booliska HirShabelle ayaa sheegay in ay qaadayaan talaabooyin ay kusoo qabanayaan shaqsiyaadkii ka dambeeyay falkaas.

Weerarka ayaa wuxuu kusoo aadayaa iyadoo dadka degaanka ay feejignaan dheeri ah ka galeen faafitaanka Coronavirus, kaas oo todoba kiis laga xaqiijiyey magaalada uqdisho oo Jowhar u jirta qiyaastii 90 KM.

GAROWE ONLINE