Mas'uuliyiin sare oo Muqdishu u tagay xafladda Caleemo-saarka oo hadda socota
MUQDISHU, Somalia - Madax kala duwan oo ka socdo wadamada Geeska Africa, Jaamacada Carabta iyo diblomaasiyiin ayaa maanta gaaray magaalada Muqdishu, si ay uga qeybgaan caleema saarka Madaxweyne Farmaajo oo hadda xafladeedu ka socota hoolkii lagu doortay ee ciidamada xooga dalka.
Madaxweynayaasha Kenya, Jabuti, Ra'isal wasaaraha Ethiopia iyo Madaxweyne ku-xigeenka Suudaan ayaa ka degay Garoonka diyaaradaha Aadan Cadde, kaasoo loo galbiyay Hoolka Caleema saarka oo ah xarunta ciidanka cirka ee Afisyooni.
Mas'uuliyiin kale oo ka socoto Kuwait ayaa saakadii hore soo gaarey Muqdishu, iyadoo la sugayo kuwa kale oo lagu casuumay xafladdan.
Safiirada beesha caalamka uu fadhiya Somalia, Wakiilada Midowga Africa iyo QM ayaa sidoo kale ka qeybgalaya Munaasabada Caleema saarka Madaxweyne Maxa'ed Cabdullaahi Farmaajo oo la doortay Feb 8, 2017.
Madaxweynihii hore Somalia, Xasan Sheekh iyo Ra'isal wasaaraha waqtigiisu dhammaaday ayaa iyaguna ku sugan hoolka caleemo, saarka halka ay joogaan Madaxweynayaasha maamullada Puntland, Jubbaland iyo Koonfur Galbeed.
Xafladda oo khudbadaheedu billaaaban ayaa hadda waxaa socda madadaalooyin iyo heeso ay tirinayaan fannaaniinta Qaranka Somalia.
Dhanka kale, waxaana la xiray waddooyinka magaalada habeenimadii xalay, iyadoo sidoo kale la joojiya duulimaadka diyaaradaha Garoonka Aadan Cadde, marka laga reebo kuwa ay la socdeen martida Caleema saarka imaanaysa.
Jadwalka Xafladda Caleemo Saarka Madaxweynaha Somalia
6:00 – 10:30 soo gelitaanka Martida
10:30 il 11:30 Madadaalo iyo suugaan
11:30 – 11:45 Furitaanka iyo kulamadda guddoomiyaha Guddiga qaban qaabada caleema-saarka Madaxweyne Farmaajo ahna wasiirka Qorsheynta Cabdiraxmaan Ceynte.
11:45 – 11:50: Aayadaha Qur’aanka Kariimka
11:50 – 12:10 Kalmadaha Wakiilka Qaramada Midoobay, xoghayaha guud ee qaramada Midoobay Macheal Keating.
12:10 – 12:30: Kalmada Wakiilka MIdowga Africa Francisco Madeira
12:30 – 12:50: Kalmadda Jabuuti: Mudane Ismaaciil Cumar Gelle
12:50 – 1:10: Kalmada Itoobiya: Hailemariam Desalegn Boshe
1:10 – 1:30: Kalmada Dowladda Kenya: Mudane Uhura Kenyatta.
1:30 – 1:50: Qudbadda Madaxweynihii hore ee Xasan Shiikh Maxamuud
1:50 – 2:20: Qudbadda Madaxweynaha Jamhuuriyadda Federaalka Soomaliya Mudane Maxamed Cabdullaahi Farmaajo.
GAROWEONLINE