MUQDISHU: Murashaxiinta Aqalka Sare oo khudbado jeedinaya
-
- Posted On 21-01-2017, 11:46AM
MUQDISHU, Somalia- Murashaxiinta u taagan Xilka Guddoonka Aqalka Sare ee Barlamanka Federaalka Somalia, ayaa iminka jeedinaya khudbadahooda ku aadan jagada ay raadinayaan ee ah Guddoomiyaha iyo labadiisa ku-xigeen.
Munasabadda khudbad jeedinta ayaa si toos ah hadda uga socota xaruntaKMG ah ee Xildhibaanada Aqalka Sare ku leeyihiin magaalada Muqdishu.
Wararka aan ka helayno goobtaas, waxay sheegayaan in jagooyinkaas u taaganyihiin Xildhibaano gaaraya 16 kuwaasoo 14 kamid ah u taaganyihiin Ku-xigeennada Guddoomiyaha.
Guddiga qaban-qaabada doorashada, ayaa goobta jooga iyo xubno kale oo kor joogto ah kuwaasoo la socda howlaha doorashada, waxaana la filayaa in maanta lasoo gaba gabeeyo khudbadaha.
Guddoomiyaha Golaha Aqalka Sare ee Barlamanka Somalia, waxaa u taagan murashaxiinta kala ah;
Cabdi Xaashi Cabdullaahi, Xildhibaan hore
Mustafe Maxamed Qodax, Xog-hayihii hore ee xisbiga mucaaradka ah ee Waddani, Somaliland.
Halka Guddoomiye ku-xigeenka 1-aad ay ku tartamayaan Todobo mudane oo kala ah;
Axmed Xaashi Maxamuud
Abshir Maxamed Maxamuud
Cabdi Axmed Dhuxulow
Cabdirisaaq Cusmaan Cali
Cabdiwaaxid Cilmi cumar
Maxamuud Axmed Maxamuud
Xasan Faarax Xujaale
Sidoo kale waxaa murashaxiin tiradoodu gaarayso 7 kale ay ku tartamayaan Guddoomiyaha Labadaas kuwaasoo magacyadooda lagu sheegay;
Cabdikaafi Macalin Xasan
Fartuun Cabdulqaadir Faarax
Hodan Maxamuud Cusmaan
Iftiin Xasan Baasto
Mowliid Xuseen Guuleed
Osmaan Axmed Maxcow
Sacdiyo Xasan Cusmaan.
Xildhibaanada ayaa khudbadahooda diiradda ku saaray waxqabadka 4 sano ee soo socota, waxayna ballanqaadyo kala duwan ku sheegeen inay jagooyinkaas kasoo bixi doonaan si daacad ah u gudan doonaan waajibaadkooda Qaran haddii EEBBE la garab galo.
Guddiga Qaban-qaabada doorashada ayaa todobaadkii hore shaaciyay in maalinta Barri ah ay dhici doonto doorashada Guddoonka, waxayna noqonaysaa taariikhda markii ugu horaysa ee Somalia ka qabsoonto howshaan oo kale.
GAROWEONLINE
