Qarax ka dhacay Muqdisho iyo Wararkii ugu dambeeyay khasaaro

Soomaliya
By Wariyaha Muqdisho , Garowe Online
Axmed Nuur Adeerow, gudoomiye ku xigeenka Deyniile oo qarax ka badbaaday

MUQDISHO, Soomaaliya - Qarax xooggan oo geestay Khasaarooyin kala duwan ayaa xalay ka dhacay magaalada Muqdisho, kaasi oo lala eegtay mas'uul katirsan maamulka gobolka Banaadir.

Inta la xaqiijiyay 5 Qof ayaa ku geeriyootay, 10 kalena way ku dhaawacmeen Qaraxa, kaasi oo ka dhashay miino lagu aasay wado ku taalla Isgoyska Sanca qeybta xigta dhanka Degmada Kaaraan.

Qaraxa ayaa dhacay kaddib markii gaari kuwa Ciidanka ah uu dul maray Miinada waddada la geliyay, balse aysan haleelin oo ay ku dhinteen dad shacab ah oo goobta ka agdhowaa, oo qaarkood wadada hareeraheeda ku ganacsanayay.

Qoobjooge ku sugnaa goobta uu qaruxu ka dhacay ayaa u sheegtay Warsidaha Garowe Online in ay aragtay dhiig daadsan jidka iyo dad qaraxa ku waxyeelloobay oo gaadiidka gurmadka deg dega u qaadeen Isbitaallada.

Afhayeenka Wasaaradda Amniga, Cabdicasiis Xildhibaan ayaa xaqiijiyay in qaraxa ay ku dhinteen 3 ruux, 9 kalena ay ku dhaawacmeen, isagoo intaasi ku daray inay wadaan baaritaan dhacdada ku aadan.

Al Shabaab ayaa sheegatay mas'uuliyadda weerarka, oo ay tilmaantay inay la eegatay gudoomiye ku xigeenka maamulka degmada Deyniile Axmed Nuurow Adeerow, kaasi oo ka badbaaday isku-dayga dilka ee lala damacsanaa.

Amniga Muqdisho ayaa mudooyinkii dambe u muuqda mid sii xumaanaya, oo ay kusoo kordhayaan qaraxo iyo dilal ay fulinayso Al Shabaab, iyadoo ka faa'idaysanaysa Khilaafka madaxda sare ee dowladda oo ku mashquulsan Mooshin.

GAROWE ONLINE

Wararkii ugu dambeeyey